చిత్ర కవిత- అంతకు ముందు- ఆ తర్వాత

అంతకు ముందు- ఆ తర్వాత

బాంబు పేలే ముందు ఆమె ఒక ఆకతాయి ఆడపిల్ల

ఆ తరువాత ఆమె ఒక స్ఫూర్తిదాత.

బాంబు పేలే ముందు ఆమె ఒక సగటు విద్యార్థిని

ఆ తరువాత ఆమె రికార్డు బద్దలుకొట్టిన ఒక ఉత్తమ విద్యార్థిని.

బాంబు పేలే ముందు ఆమె మామూలుగా వ్రాసేది

ఆ తరువాత ఆమె డిక్టేట్ చేసేది, లేక ఒక వేలుతో టైపు చేసేది.

బాంబు పేలే ముందు ఆమె అందంగా కనిపించాలనుకునే కోట్ల మందిలో ఒకరు

ఆ తరువాత ఆమె దివ్యాంగులకై మోడలింగ్ చేసిన కొద్దిపాటి స్త్రీలలో ఒకరు.

బాంబు పేలే ముందు ఆమె ‘తను-తనలోక’మనే గిరి గీసుకున్న సగటు మనిషి

ఆ తరువాత ఆమె దివ్యాంగుల సంక్షేమానికై పాటు పడే మహా మనీషి.

బాంబు పేలే ముందు ఆమె డా|| అబ్దుల్ కలాం గారి గురించి విని ఉంది

ఆ తరువాత ఆమె ఆయనను కలుసుకుని, అయన మెప్పు పొందింది.

బాంబు పేలే ముందు ఆమె ఐక్యరాజ్యసమితి గురించి విని ఉంది

ఆ తరువాత ఆమె ఐక్యరాజ్య సమితినే ఉద్దేశించి ప్రసంగించే అవకాశాన్ని దక్కించుకుంది.

బాంబు పేలే ముందు ఆమె అందరిలాగా సాధారణ జీవితం గడిపింది

ఆ తరువాత ఆమె అందరికీ ఆదర్శప్రాయమయ్యే జీవితాన్ని గడుపుతోంది.

బాంబు పేలే ముందు ఆమెకు వైకల్యం తెచ్చిపెట్టే పలువ్యధల గురించి తెలియలేదు

ఆ తరువాత ఆమె వైకల్యమంటే కష్టమేమిటో తెలుసుకుంది.

బాంబు పేలే ముందు ఆమె అంగవైకల్యముంటే జీవితం దుర్భరమనుకుంది

ఆ తరువాత తనకు అసాధారణ కీర్తి తెచ్చిన ఆ వైకల్యానికి ధన్యవాదాలు చెప్పుకుంది.

వైకల్యం ఉంటే పెళ్ళికాదని లోకం కోడై కూసింది

వైకల్యం ఉన్నా తగు మంచి వాడు దొరుకుతాడని ఆమె నిరూపించింది.

బాంబు పేలే ముందు ఆమె వైకల్యమంటే ఒక రకమైన కష్టమనుకుంది

ఆ తరువాత తప్పుడు వైఖరి కన్నా వైకల్యం లేదన్న మాటలోని నిజాన్ని తెలుసుకుంది.

తన దివ్యాంగాన్ని అంగీకరించే ముందు ఆమెకు తన స్థితిపై జాలి వేసింది

ఆ తరువాత ఆమెకు స్థితప్రజ్ఞత సిద్ధించింది.

ఆమె పేరు మాళవిక అయ్యర్

అప్పటికీ ఇప్పటికీ మారనిది

కోటి దీపాలని వెలిగించగలిగే

ఆ నిష్కల్మషమైన చిరునవ్వు.

************