ఏ రీతి కీర్తింతునో రామ
ఏ రీతి కీర్తింతునో రామ
నిన్నే రీతి వర్ణింతునో రామ
మీ వంశాన్ని పొగడగ కాళిదాసుని కాను
నీ శౌర్యాన్ని కీర్తింప వాల్మీకిని కాను
నీ దర్శనము పొందగ నీ దాసుని గాను
నీ నామ పారాయణమనునిత్యము జేయ నే త్యాగరాజును
కాను || ఏ రీతి||
నీ సాహచర్యము పొంద నే సీతను కాను
నీ వెంట అడవులకేగ నేను లక్ష్మణుడ కాను
నీపై అవ్యాజ భక్తి జూప పవనసుతుడ కాను
నిను జూచి, వెరచి వెనుకకు పోవ నే సముద్రుడ గాను
|| ఏ రీతి||
నీ పాద స్పర్శకు నోచ నే నహల్యను గాను
నీచే విరువబడుటకు హరువిల్లును కాను
నీచే దీవింపబడుటకు జటాయువును గాను
నీ వేళ్ళ ముద్రలు మోయుటకు నే నుడుతను గాను || ఏ
రీతి||
పితృవాక్య పరిపాలనలో నీకు సాటిరాలేను
దానవ మథనము సేయుట కశక్తురాలను
శత్రువును క్షమించుటకు కష్టపడుదును
నీ భక్తులకు నేమాత్రము పోలనను నేను || ఏ రీతి||
*******
No comments:
Post a Comment